KA THIAN

(Ka thiannu tan liau2-a ka ziah)

Lal tualzawla tualchai pha nilo mah se thing delh loh na na na chu puitlin hun alo nei ngei e; thlahtu te lamah chhuan tur a neilo, amah hringtu nu-in duat taka a enkawl seilen a nihna chauh lo chu.

Tleirawl a hre chho tan a, hmelduh a neih ve te chu atan chhai ngam an nilo tih a hria. Amah inen reng chungin a phu tawk a zawng ve a, an duh lo rairah zawng. Lungloh tui dawna piallei dai belh mai chak chang a nei a, a chunnu lungkham paihbo sak erawh a zuam bik silo.

Rual pawl ve nana Zirna run sang a kai ve lah chhuan tham ni silo chu, run sang kai belh tumin tan han khawh teh mah se; a chunnu tana phurrit belhchhahtu mai a ni dawn tih a hre si. A phak tawk, chan tawka lungawi chu harsa a ti thin.

Siamtu'n a tana a duan lawk chu enge ni ang? a tan hian hlimni kawl a eng ve thei angem? chu zawhna chhan harsa tak chu Khuannu-i'n alo ruat sak hresa tan lo chuan chhan a harsa ngei ang. Chung Pathian hi a awm reng a nih chuan a ensan bik erawh a ring ngailo.

Thihnain hringnunah thla a zar hma loh chuan hringfa te hi khawvelah kan la awm dawn tih a hria a; bei nge sei run dung tiin Kamding nih a tum tlat a, chu a beiseina chuan tumruhna pe-in damna a chang ta. Hunliam tawh hnu chu hriat reng tlak nilo khawpa hrehawm nimah se, a beisei kawl eng chuan a hlimthla te chu a ti fiah zo ta lo.

Hringnun hian hlim ni a hmachhawn hmasa zawk a nih ngai chuan tahna chuan a zawm ziah a; hrehawmna thlang hmasa tu erawh chuan hlimna a chhar chhuak leh thin. Hlimni te chuan par chhuahin, rairah tan pawh chunnu mawhhurhna a pe ve a; a theihtawp chhuah ve nia a inhriat laiin, zuapa'n chawlhtui ningzu alo dawn thin si..... (to be continue.......)

Daidanna bang nghet

Tunah zawng an khawvel siam thar a dang ta si a, an khawvel suangtuah ve te kha a tak ram chang theise tiin beiseina an nei thin a nih kha. Hringnun hriat lawk loh hi a ropuina tak nimahse, hlimlai chen tuma Hmangaih par tlantu te tan chuan tahna a nisi.

Thinlung inhnaih tak siin, daidanna bang nghet tak chuan a then hrang a; chu daidanna bang chu thiah leh tihchhiat theih nimahse, daidanna bang phenah chuan au thawm leh sulhnu bak hriat tur a awm dawn chuang si lo. Thinlung inhnaih tak ten thiah chak hle mahse, thiah loha a awm chu an duh bawk si.

Ni e, hriatthiam zawh loh thinlung atanga chhuak hmangaihna chu, alo chhuahna chuan hrethiam thin mahse, a a puangchhuaktu hriatna chuan hrethiam turin hun a duh miau si a. Hun a duh rei avang chuan thinlung atanga chhuak hmangaihna nilo zawk chu a thlang a, chu chuan a hringnun chu hliamin, tahna ala thlen dawn chauh tih a hre si lo.

A thinlunga alo luh tir tawh chuan chhuahsanin hre mahse, a rukin a zawng reng a; engtik ni-ah emaw chuan alo luh leh ring chungin hmun awl alo la dah a. Mahse, a thinlung lo luahtu dang chuan hmun ruaka sûlhnu a hmuh chuan Daidanna bang alo siam sak ta zawk si a. Daidanna bang phenah chuan sulhnu dang hnutchhiah sakin, a damchhung atana a hriat reng tur alo dah ve a.

Hun te a liam a, a hriatnain thinlung hmangaihna dik a hriatthiam hnuah a thinlung chabi kawl tu chu a zawng hmu ta. Mahse, hrethiam tura hun a khawh ral tam avangin hmangaihna tih chauh lo chu engkim a danglam zo ta si a. A thinlung kawngkhar a hawn tir leh hnu chuan daidanna bang nghet tak chu an hmu a, chu daidanna bang chu thiat ta se Mualphona leh sulhnu bak hmuh tur a awm dawn silo.

Hmangaihna dai tawh ngai lo tur chen dun thei tawh lo mahse, dawhthei taka beiseina nena hringnun hmang chungin, Thiantha an in chan a; Hun tha her chhuak tawh lo mahse a dai tawh ngai dawn lo tih hre rengin, tap chunga nitin zantin thinlung inpawhna thu inhrilh tawnin damchhung hun an hmang dawn ta.

He hriat lawk theih loh hringnun hi, tung chho-a kal hringmi te tan hian kan dam chhung atana bet a ni tlat si a; a tawng tawh ten siamthat leh theih ngei beiseia an hrilchhawn laiin, a ngaihthla tu tan thawnthu a chang thung a. Hringnun hi zawng mahnia dai hriat ngai, midang tel ve theih lohna a ni miau si alawm.